Hargeysa (Caasimada Online) – Xukuumadda Somaliland ayaa soo saartay digniin culus oo ku saabsan dabeylo xooggan oo la filayo inay ku dhufan doonaan Badda Gacanka Cadmeed, gaar ahaan meelaha ay maamusho Somaliland.
Digniintan ayaa ah mid la xiriirta xaalad cimiladeed oo halis ah, taasoo khatar ku noqon karta dadka ku sugan ama ka shaqeeya meelaha xeebaha ah.
Qoraal rasmi ah oo ka soo baxay Ciidanka Ilaalada Xeebaha Somaliland ayaa si gaar ah ugu digay kalluumaysatada, dadka dalxiiska ku taga xeebaha, iyo guud ahaan cid kasta oo u dhow ama isticmaasha badda, inay si weyn uga taxaddaraan dabeylahan la saadaaliyey. Ciidanku wuxuu carrabka ku adkeeyay in la iska ilaaliyo khataraha laga yaabo inay dabeyluhu sababi karaan.
Sida lagu sheegay digniinta, dabeylaha la saadaaliyey waxay si gaar ah u saameyn doonaan qaybo kamid ah xeebaha dalka. Ciidanku wuxuu ugu baaqay bulshada inay si dhow ula socdaan talooyinka iyo warbixinada cimilada si aysan uga mid noqon dadka ay saameeyaan xaaladaha deg-degga ah ee laga digayo.
Saadaasha cimilada ayaa sidoo kale muujisay in heerkul aad u sareeya laga filayo deegaannada xeebaha, iyadoo la sheegay in uu gaadhi doono ilaa 41°C. Tani waxay caddeynaysaa in sannadkani yahay mid kamid ah kuwa ugu kulul ee deegaanka laga dareemo, arrin sii xumayn karta xaaladda nololeed ee dadka xeebaha ku dhow.
Warbixintu waxay tilmaantay in xawaaraha dabeylaha uu noqon doono inta u dhaxaysa 14km/h ilaa 45km/h. Xawaaraha noocan ah wuxuu keeni karaa mowjado xooggan, burburin kara doonyaha yar yar ama khatar galin kara dadka aan feejignayn. Tani waxay keentay in ciidanku xoojiyo digniintiisa si loo yareeyo khasaaraha iman kara.
Dhinaca kale, mowjadaha badda ayaa la saadaaliyay inay sare u kici doonaan ilaa 1.9 mitir, taasoo khataro gaar ah u keeni karta gaadiidka badda iyo shaqaalaha kalluumeysiga. Dadkaas ayaa loogu baaqay inay ka fogaadaan badda inta ay xaaladdu sidan tahay.