Washington (Caasimada Online) — Madaxweynaha Mareykanka Donald Trump ayaa sheegay inuusan si degdeg ah u raaci doonin tallaabada Ra’iisul Wasaaraha Israa’iil Benjamin Netanyahu uu ku aqoonsaday maamulka Somaliland.
Trump oo u warramayay wargeyska New York Post Sabtidii, ayaa caddeeyay inuu u baahan yahay “inuu darso” qorshaha Israa’iil ee ku wajahan arrintan.
Jimcihii, Netanyahu iyo Madaxweynaha Somaliland Cabdiraxmaan Maxamed Cabdullaahi (Cirro) ayaa kala saxiixday bayaan wadajir ah, kaas oo Israa’iil ka dhigaya dalkii ugu horreeyay ee xubin ka ah Qaramada Midoobay oo aqoonsada gobolka Somaliland.
Inkastoo Netanyahu uu sheegay in heshiiskan uu waafaqsan yahay “Ruuxda Heshiisyada Ibraahim” (Abraham Accords)—kuwaas oo uu hindisay Madaxweyne Trump—isla markaana uu u ballanqaaday Madaxweyne Cirro inuu Trump u gudbin doono rabitaanka iyo u-heellanaanta Somaliland ee ku biirista heshiisyadaas, haddana New York Post ayaa werisay in Trump uu mudnaanta koowaad siinayo wadahadallada xabbad-joojinta Gaza marka uu la kulmo Netanyahu.
Isagoo beeninaya in Mareykanku uu qorshe degdeg ah u leeyahay inuu raaco wadada Tel-Aviv ee aqoonsiga, Trump ayaa is-weydiiyay: “Qof dhab u garanaya waxa ay tahay Somaliland ma jiraa?”
Trump ayaa horey u muujiyay inuu ka fiirsanayo arrinta Somaliland, isagoo bishii Agoosto yiri: “Hadda waan eegeynaa arrintaas. Waa su’aal fiican, run ahaantii. Waana mid cakiran sidaad la socotaan. Laakiin hadda waan ka shaqeyneynaa—Somaliland.”
Go’aanka Israa’iil ee aqoonsiga Somaliland ayaa la kulmay dhaleeceyn xooggan oo uga timid dalal dhowr ah, oo ay ka mid yihiin Masar, Turkiga iyo Sacuudi Carabiya.
Dhinaca kale, Hawlgalka Falastiin ee Qaramada Midoobay ayaa sheegay in Israa’iil ay dooneyso in ay Somaliland u rarto shacabka Gaza ee la barakicinayo, wuxuuna yiri “Dowladda Falastiin waxay xaqiijineysaa diidmadeeda buuxda ee qorshayaasha Israa’iil ee barakicinta qasabka ah ee dadkeenna.”
Bishii Maarso, Wasiirka Arrimaha Dibadda Somaliland ayaa u sheegay idaacadda dadweynaha Israa’iil ee Kan: “Diyaar ayaan u nahay inaan ka wadahadalno arrin kasta, laakiin ma dooneyno inaan ka hadalno waxyaabo aan weli la isla soo qaadin. Dhammaan dalalka daneynaya inay nagala hadlaan arrimo gaar ah waa inay marka hore nala sameystaan xiriir shaqo oo ay safaarado ka furtaan Somaliland.”