Muqdisho (Caasimada Online) – Tan iyo markii uu dhacay weerarkii Hotel SYL waxaa adkaaday isku socodka aagga madaxtooyada Soomaaliya, waxaana lagu soo kordhiyey baatiraano dheeraad ah, si looga hor tago weerarro kale.
Ciidanka ilaalada madaxtooyada ee Koofiya-casta loo yaqaano ayaa lagu amray inay baaritaanada adkeeyaan, qof kasta oo masuul ah waxaa laga dejinayaa gaarigiisa, kadibna toos ayaa loo baarayaa gaadiidka iyo dadka.
Sidoo kale waxaa la diiday in gudaha madaxtooyada lala galo wax hub ah oo aan sharci laheyn, sida ID-card u gaar ah hey’adaha ammaanka, xitaa bistooladaha ayaa lagu qabsanayaa agaasimayaasha iyo masuuliyiinta kale ee dowladda.
Askari kasta xiliga uu shaqada ku jiro wuxuu iska ilaalinayaa in wax uusan baarin ay dhaafaan, maadaama korkiisa ay Kaamiro ku xiran tahay, isla markaana rag badan loo xiray weerarkii dhawaan ka dhacay hotel SYL.
Sidoo kale waxaa la mamnuucay in qof aan wadan ID-card, gaar ahaan aqoonsiga hey’adaha degan gudaha madaxtooyada uu galo xeyndaabka, qofkii aan aqoonsi wadana waxaa laga reebayaa gaariga uu la socdo, hadii uu caadi u socdana iskaba daa.
Cabsida amni ee ka jirta aagga madaxtooyada waxaa barbar socda qorshaha dastuurka oo xasaasiyadiisa wata, berri ayaa lagu wadaa in labada aqal ee baarlamaanka la hor geeyo baarlamaanka, si ansixintiisa ay ugu codeeyaan.
Ciidamada ilaalada madaxtooyada ayaa sii adkeeyey heeganka ay ku jiraan, maadaama xamaasad gaar ah uu leeyahay dastuurka oo dhinacyo badan ay diidan yihiin in loo meel marityo sida ay damacsan tahay Villa Somalia.
Madaxweynayaashii hore Sheekh Shariif iyo Farmaajo ayaa soo saaray war-saxaafadeed ay uga digayaan baarlamaanka inay ansixiyaan dastuurka la hor keeni doono berri oo Sabti ah 30-ka Maarso, kaas oo sida ay sheegeen Xasan Sheekh oo ku marooqsano awooda baarlamaanka iyo xukuumadda.